TINO KATOA (#10954)

Toku Atua Tela e tapuaki kae ifo ne au!  E molimau au ki Tou tafatasi mo Tou fakatasitasi, kae e fakamaonia au ki Au mea-alofa, i taimi ko teka mo taimi nei.  Ko Koe ko te Kaimalie-Katoatoa, tela a Tou alofa-kaimalie ko ligi ifo pela me ne vaiua lotu ki tino maluga mo tino malalo katoa, mo te gali o Tena alofa ko oti ne fakaasi ki luga ia latou fakalogo pela foki mo latou teke.
     O te Atua o te alofai-fakamagalo, i mua i Tena mataloa a te alofa ma-takalekale ne punou atu, kae e siomia faka-pukupuku i te gali o Tena Fakatokaaga alofa-atafai, tela e i loto a te agaaga tonu, ne tamilomilo, matou e akai totuli kia Koe, kae akai ki Tou alofa mai ana mua loa, kae salasala ki Au mea-alofa nei, ko te mea ke mafai ne Koe o alofa kia latou katoa ko la ko faaliga o te lalolagi o tino, kae ke se taofigina foki a latou mai i maligiiga o Tou alofa kaimalie i Ou aso.
     Katoa e mativa kae e se lava, a ko Koe, e tonu, ko te Aofiaaga-Katoatoa, ko te Pule-Katoatoa, ko te Maalosi-Katoatoa.

-Bahá'u'lláh
-----------------------

TINO KATOA (#10955)

O ko Koe a te Aliki kilo-alofa, ko Koe Tela e kaimalie kae fai mea mafai!  Matou ko Au tavini e malu mai lalo o Tou takitakiiga atamai.  Kilo mai a Ou mata alofa kia matou.  Aumai a te mainaaga ki o motou mata, lagona ki o motou taliga, mo te malamalama mo te alofa ki o motou ata.  Fai aka a motou agaaga ke lifu kae fiafia mai i luga i Au fakaasiiga fakafiafia. O te Aliki!  Fakasino mai kia matou a te auala o Tou maalo kae fakaola a matou katoa mai i te manavaaga o te Agaaga Tapu.  Tuku ifo kia matou ate ola se gata mai kae fakasafe ki luga ia matou a te malu e se-mafai o gata.  Fusi fakatasi a tino katoa kae fakamaina a te lalolagi o tino katoa.  Ke mafai ne matou o tautali i Tou auala, finafinau ki Tou loto fiafia kae sala ki mea funa o Tou maalo, O te Atua!  Fusi tasi matou kae sokotaki a motou loto mo Tau feagaiiga e se-mafai o maofa.  E tonu, a Koe ko te Foai, a Koe ko te Alofa Tokotasi a ko Koe ko te Mafi-Katoatoa.

-`Abdu'l-Bahá
-----------------------

TINO KATOA (#10956)

O ko Koe ko te Aliki alofa!  O ko Koe tela e alofa kae kaimalie!  Matou ko tavini o Tau Mataloa kae fakatasi mai lalo o te malu o tea ta o Tau tafatasi faka-te-lagi.  A te laa o Tou alofa-kaimalie e sulu maina kia latou katoa, a ko kaumana o Tou maukoloa e ligi ifo kia luga ia matou katoa.  Au mea-alofa e oko kia tino katoa, a Tou takitakiiga atamai e tausi ne ia matou katoa, a Tau puipuiiga e oko kia latou katoa, a ko kiloga o Tou alofa e aofia latou katoa.  O te Aliki!  Tuku mai Au mea-alofa, kae fai a te molii o Tau takitakiiga ke maina.  Fakamaina a mata, fai a loto ke lifu mo te fiafia lasi.  Tuku mai se agaaga fou ki luga i tino katoa kae kae fakaoko mai kia latou a te ola e se-gata mai.  Tala a mataloa o te malamalama tonu kae fai a te molii o te fakatuanaki ke sulu maina mo te malifalifa.  Luku mai a tino katoa mai i lalo o te ata o Tou alofa kae fai latou ke fusi fakatasitasi mo te fealofani, ko te mea ke mafai ne latou o fai ke pela mo vae o te laa e tasi, pe la mo galu o te vasa e tasi, kae ke pe la mo fuaga lakau o te lakau ola e tasi.  Ke mafai ne latou o inu mai ite vai e tasi. Ke mafai ne latou o fakasagi i te matagi malielie e tasi.  Ke mafai ne latou o maua a te faka malamalamaaga mai i te mainaaga e tasi.  Ko Koe ko te Foai, ko te Kaimalie, ko te Tafasili i te Maluga.

-`Abdu'l-Bahá
-----------------------

TINO KATOA (#10957)

O te Atua, O ko Koe Tela ne tuku atu a Tou gali ki luga i te mainaaga o te tina mea tonu ki tagata, e tufa atu ki luga ia latou a molii malifalifa o te poto mo te takitakiiga, kae ko oti ne filigina a latou mai i mea faiite katoa mo te alofaaga maluga tenei, kae ko pokotia a latou o aofia iei a mea katoa, ke malamalama i olotou uiga poko, kae ke fakaasi atu a olotou mea lilo, e aumai iei ne latou ki mua mai ite pouliga ki te lalolagi matea!  A Ia e tonu e ligi mai a Tena alofa fakapitoa ki so se tino e loto a Ia ki ei!” (1)
     O te Aliki, fesoasoani a Koe ki Au fagasele ke maua ne latou a te poto mo te saienisi mo mataupu kese kese, kae ke tala ne latou a mea funa ko la e tuku i loto i te kanoloto o mea faiite katoa.  Fai ke lagona ne latou a mea tonu e lilo ko la e tusi kae fakammau i loto o tino taki toko tasi.  Fai a latou me ne failoga o te takitakiiga i vasia o mea faiite katoa, mo vae makaikai o te mafaufau te la e sulu atu a te olotou mainaaga i te mea tenei, ko te “ola muamua.”(2)  Fai latou me takitaki kia Koe, leoleo ki Tou auala, tino fakatau tele o fakamaalosi a tagata ki Tou Maalo.
     A Koe e tonu ko te Maalosi, ko te Puipui, ko te Kaumalolo, ko te Mafai-o-Teke-atu, ko te Mafi, ko te Tafasili i te Atafai.

-`Abdu'l-Bahá
-----------------------

